បន្ទាប់ពី បន្ដពង្រីកទីផ្សារគ្រប់ទីកន្លែង និងមានឈ្មោះបោះសម្លេងលើការផលិតរថយន្ដអគ្គិសនីដែលមានតម្លៃទាប និងក្លាយជាដៃគូប្រកួតដ៏ស្វិតស្វាញនឹង Tesla ថ្មីៗនេះ BYD បានប្រកាសនឹងនាំយករថយន្ដអគ្គិសនីពេញនិយម តម្លៃ ២៥០០០ ដុល្លារ របស់ខ្លួន BYD Seal ទៅវាយលុកទីផ្សារកូរ៉េខាងត្បូងវិញម្ដង ដែលជាទឹកដីនៃ Hyundai នៅឆ្នាំ ឆ្នាំក្រោយនេះ។ 

តាមការឲ្យដឹងពី Electrek ថាបន្ទាប់ពីបង្ហាញមុខនៅក្នុងទីផ្សារចិន កាលពីឆ្នាំ ២០២២ កន្លង​មក BYD Seal បានបន្ដព្រីកទីផ្សាររបស់ខ្លួនទៅកាន់ប្រទេសផ្សេងៗក្នុងតំបន់អឺរ៉ុប អូស្រ្ដាលី និងប្រេស៊ីល ដែលក្លាយទីជាគូប្រកួតនាំមុខគេជាមួយនឹង Tesla Model 3 ដែលក្រុមហ៊ុនត្រៀមខ្លួនបន្ដនាំរថយន្ដអគ្គិសនីម៉ូដែលនេះទៅកាន់ទីផ្សារប្រទេសដែលមានតម្រូវការថយន្ដអគ្គិសនីខ្ពស់ផ្សេងៗទៀត។ 

BYD Seal ជារថយន្ដអគ្គិសនីសុទ្ធ ប្រភេទ sedan បណ្ដាយខ្លួន ៤.៨ម ទទឺង ១.៨៧ម និងកម្ពស់​ ១.៤៦ម ជាមួយតម្លៃ ចាប់ផ្ដើមពី ២៥០០០ ដុល្លារ (នៅចិន) នឹងសមត្ថភាពអាចបើកបានចម្ងាយ ៥៥០គម សម្រាប់ Seal EV Honor Edition និង ៥៧០គម ជាមួយតម្លៃ ៤៨៥០០ ដុល្លារ សម្រាប់ Seal EV នៅអឺរ៉ុប។ 

យ៉ាងណាមិញ BYD Seal តម្លៃទាប នឹងត្រៀមខ្លួនចូលទៅក្នុងទីផ្សារកូរ៉េខាងត្បូងឆាប់ៗនេះ បន្ទាប់ពីឆ្លងកាត់ការត្រួតពិនិត្យរួចរាល់ពីស្ថាប័ន ត្រួតពិនិត្យរថយន្ដនាំចូលរបស់កូរ៉េរួចរាល់ ដែលគេរំពឹងថាវានឹងក្លាយទៅជាគូប្រកួតប្រជែងធំរវាង IONIQ6 នៃក្រុមហ៊ុនម្ចាស់ផ្ទះ Hyundai និង Model 3 របស់  Tesla ដែលកំពុងតែមានសន្ទុះពេលបច្ចុប្បន្នដែរ។ 

យ៉ាងណាក៏ដោយ ក្រុមហ៊ុនម្ចាស់ផ្ទះ Hyundai និង Kia ក៏កំពុងដុតដៃដុតជើងផលិតរថយន្ដអគ្គិសនីតម្លៃសមរម្យរបស់ខ្លួន ដែរ​ ដោយកាលពីពេលថ្មីៗនេះ Hyundai ក៏ទើបតែចេញ Casper EV សេរីថ្មីមកក្នុងទីផ្សារកូរ៉េខាងត្បូង និង Inster EV ទៅកាន់ទីផ្សារអឺរ៉ុបផងដែរ ខណៈ Kia ក៏ទើបតែចេញ EV3 របស់ខ្លូនជាមួយតម្លៃខ្ទង់ ៣០ ៧០០ ដុល្លារមកក្នុងទីផ្សារកូរ់េ និងត្រៀមទៅអឺរ៉ុប ចុងឆ្នាំនេះ និងផ្សារមិចសិចកូ និងអាមេរិកឆ្នាំ ២០២៥ នេះផងដែរ។ 

គួរបញ្ជាក់ផងដែរថា ស្របពេលកំណើននៃរថយន្ដអគ្គិសនីនាំចូលពីក្រៅប្រទេសចូលមកក្នុងកូរ៉េខាងត្បូង ក្រុមហ៊ុន Hyundai និង Kia នៅតែរក្សាដំណែងជាក្រុមហ៊ុនលក់ដាច់រថយន្ដអគ្គិសនីឈានមុខគេ ក្នុងទីផ្សារប្រទេសកំណើតរបស់ខ្លួនដដែល។ 

អត្ថបទ៖ Andra 

ប្រភព៖ Electrek 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!